انك يبقى عندك فكرة تستاهل إنك تتعب علشانها، وكمان لازم يبقى عندك الأساسيات.
علشان كدا اللى بنقدمهولك النهاردة هو عبارة عن سبع خطوات بسيطة جدا ومجربة، علشان تجذب الناس للموقع بتاعك وتشجعهم يشتروا.
الخطوات البسيطة دي هتضمن نجاحك وانت بتحاول تبدأ مشروعك اونلاين، وفي الاف من الناس نجحوا بأنهم اتبعوا الخطوات دي:
1- دور على الاحتياج واملاه.
2- اكتب مقدمة تسويقية ناجحة.
3- صمم ونفذ موقع بسيط وسهل الاستخدام.
4- استخدم محركات البحث علشان تجذب الناس للموقع بتاعك.
5- سوق نفسك!
6- داوم على المتابعة مع عملائك.
7- زود دخلك عن طريق البيع المتزايد والبيع المتكرر.
سواء كنت مبتدئ او خبير، اكيد هتستفيد من الخطوات دي في إنك تتعلم ازاى تبدأ شغلك اونلاين.
أولا: دور على الاحتياج واملاه.
معظم الناس اللي لسه بتبدأ بتقع في نفسك الغلطة! انها بتدور علي المنتج الأول وبعد كدا السوق.
علشان تزود من فرص نجاحك، ابدأ بالسوق.
الفكرة إنك تلاقى مجموعة من الناس عندها مشكلة وبتدور على حل بس مش لاقيه. الانترنت بيخلى النوع دا من أبحاث السوق حاجة سهلة جدا:
– زور المنتديات والجروبات على النت علشان تتعرف على المشاكل اللي الناس بتدورلها على حلول.
– دور على كلمات البحث اللي ناس كتير بتستخدمها في انها تدور على الحاجة دي، بس في نفس الوقت مفيش مواقع كتير بتستخدمها.
– أدرس البيئة التنافسية، زور مواقع المنافسين المحتملين “اللي بيشتغلوا في نفس مجالك او قريبين منه” ولاحظ هما بيعملوا ايه علشان يلبوا الحاجة دي. ساعتها انت تقدر تستخدم كل المعلومات اللي جمعتها دي علشان تصنع منتج لسوق حقيقي وموجود فعلا، وتعملوا أحسن من اي حد تاني.
ثانيا: اكتب مقدمة تسويقية.
في توليفة بيع كدا مؤكدة بتخلي زائر الموقع بتاعك يتجه على طول لأنه يشتري المنتج بتاعك.
ازاى الكلام دا؟
شوف يا سيدي
– اجذب اهتمامه بعناوين مقنعة.
– اشرح المشكلة اللى المنتج بتاعك بيحلها.
– أكد مصداقيتك بانك تأكد إنك صاحب الحل العبقري للمشكلة دي.
– ضيف توصيات من ناس استخدمت المنتج بتاعك فعلا.
– أتكلم عن المنتج واد ايه هو مفيد للمستخدم.
– اعمل عروض.
– قدم ضمانات قوية.
– أخلق الحاح “زى مثلا عرض لفترة محدودة او الحق العرض”.
– اسأل علشان تبيع. دى طريقة من طرق تقفيل الdeal زى مثلا انك تسأل الناس علشان تخلى الناس تقرر، زى مثلا: في اى أسئلة تانية؟ طريقة الدفع كويسة بالنسبالك؟ و هكذا؟”
من خلال عرضك دا ، حاول تركز على اد ايه المنتج او الخدمة اللي انت بتقدمها تقدر انها تحل مشاكل الناس او تحسن حياتهم. وحاول تفكر من وجهة نظر الزبون “يعنى قول لنفسك يا تري انا لو مكانه كنت هعمل ايه ؟”
ثالثا: صمم ونفذ موقعك.
مجرد مانت لقيت السوق والمنتج، انت كدا ظبطت تماما عملية البيع، ودلوقتى انت جاهز علشان تصمم الموقع “الوجهة بتاعتك” =D
بسطها على اد ما تقدر، لان انت ادامك اقل من 5 ثواني علشان تجذب اهتمام الناس والا هيروحوا ومش هتلاقيهم تانى ابدا.
خلى بالك من الاتي:
– استخدم خط واحد او اتنين على خلفية بيضاء.
– خلى طريقة الانتقال من صفحة للتانية واضحة وبسيطة وهي هي في كل صفحة.
– استخدم الصور والصوت والفيديوهات اللي بتخدم رسالتك بس.
– خلى عملية الشراء سهلة جدا، خطوة واحدة او اتنين بالكتير.
– خلى بالك ان الموقع بتاعك دا الواجهة او الفاترينة بتاعتك، حاول تخلية ظريف وجذاب.
رابعا: استخدم محركات البحث “زى جوجل وياهو وغيره” علشان تجذب الناس للموقع بتاعك.
من أسهل الطرق اللي ممكن تستخدمها علشان توجة الناس للموقع بتاعك وخصوصا لو موقع جديد هي طريقة الدفع عند الضغط او اللى بيسموها pay-per-click “PPC”.
و دى اللى هي إعلانات الانترنت اللى بيقولوا عليها ، زى جوجل ادسنس او ادبرايت و غيرها، بتسمح للمواقع دى انها تحط اعلانتها عالويب سايت بتاعك و في المقابل بتوجة الناس للموقع بتاعك و مقابل مادى، بس الدعاية هي الأهم طبعا.
الطريقة دي أفضل بكتير من أنك تستنى الناس تيجى لموقعك لوحدها، وليها ميزتين مهمين: أولا: إعلانات الPPC دى بتظهر على صفحة البحث على طول، وثانيا: ان الإعلانات دى بتسمحلك انك تجرب كلمات بحث مختلفة كمان عناوين وأسعار وطرق البيع المختلفة.
مش بس بتجيبلك جمهور بسرعة جدا، لكن كمان انت ممكن تستخدم إعلانات ال PPC، علشان تكتشف اكتر عدد من كلمات البحث الرئيسية اللى بيسموها High Converting keywords و اللى محركات البحث دى بتستخدمها و بتضيفها في اعلاناتها علشان تجذب اكتر عدد من الناس للموقع.
بص ملاحظة صغيرة كدا ركز معايا =D كلمات البحث الرئيسية دى هي اكتر كلمات الناس بتستخدمها في البحث، علشان كدا كل ما الكلمات دى اتكررت في الموقع بتاعك كل ما الموقع ظهر اكتر في نتايج البحث. وضحت ؟ =D
فبالتالى انت لو خدت الكلمات دى و وزعتها في موقعك في المقدمة و في الكود “بس من غير حشر =D” ، موقعك هيظهر اكتر و هتزوره ناس اكتر و اكتر.
خامسا: سوق نفسك على إنك الخبير في مجالك او اكتر شخص محل ثقة.
– الناس بتستخدم الانترنت علشان تلاقى المعلومات تمام ؟ قدم انت المعلومات دي ببلاش لمواقع تانية و انت هتلاقي جمهور اكبر بكتير وهتظهر اعلى في نتايج البحث. السر هو انك دايما تضيف لينك للموقع بتاعك مع كل معلومة بتقدمها.
– قدم محتوى مجانى، اكتب مقالات، فيديوهات او اى محتوى تانى مفيد للناس. وزع المحتوى دا عن طريق دليل المقالات “مواقع عليها مقالات كتير جدا في مجالات مختلفة” او مواقع التواصل الاجتماعي الكتيرة.
– حط لينكات “ارسال الى صديق” على المواضيع القيمة على موقعك. كدا انت بتنتشر اكتر واكتر.
– خليك نشيط و متابع دائم على المنتديات و الجروبات و مواقع التواصل الاجتماعى “فيس بوك و غيره” اللى فيها تمركز لجمهورك المستهدف.
بالشكل دا انت هتوصل لناس اكتر، مش بس كدا.. كل موقع هينشر المحتوى بتاعك، هيضيف لينك الموقع بتاعك كمان. و داه يزود فرص ظهورك في نتايج البحث و هيزود الترتيب بتاعك.
سادسا: استخدم القوة الخفية للايميل علشان تحول الزوار الى مشتريين.
لما بتبنى قايمة بايميلات و تسمح للناس تشترك فيها “اللى بيسموها opt-in” ، و دى عبارة عن نظام او زى تطبيق بيتيح ليك انك تبعت ايميلات كتير لعدد كبير جدا من الناس زى إعلانات او منشورات بس كل اللى عليك تحط اللينك عالموقع و الناس تشترك فيه، انت كدا بتخلق اهم ركيزة من ركائز الشغل بتاعك كله ! الزباين والمشتركين في الايميل بيدوك اذن إنك تبعتلهم ايميلات، دا معناه:
– انت بتقدملهم حاجة هما اللي طلبوها.
– انت بتكون علاقة مدى الحياة معاهم.
– قدرتك إنك تقيس تفاعلهم 100%.
– التسويق عبر الايميل أرخص وكفاءته اعلى من المطبوعات، التلفزيون، الراديو دا لان ناس كتير بتتجه للوسايل دى.
سابعا: زود دخلك عن طريق البيع المتزايد والبيع المتكرر.
واحدة من اهم طرق التسويق عبر النت هي إنك تكون قيمة مدى الحياة للمنتج بتاعك.
على الأقل 36% من الناس اللي اشترت منك مرة هترجع تشتري منك تانى لو كنت بتتابع معاهم.
إنك تتم البيعة الأولى دا تقريبا أصعب جزء، دا طبعا غير انه أغلى جزء.
علشان كدا استخدم البيع المتكرر، علشان تخليهم يشتروا تانى:
– قدم منتجات بتكمل المنتج الأصلي اللي اشتروه.
– وزع كوبونات ولاء اللى ممكن يستخدموها لما يرجعوا تانى.
– اعرض منتجات تانية ليها علاقة بالمنتج اللى اشتروه بتاعهم على صفحة او رسالة الشكر على الشراء.
– كافئ عملائك على ولائهم، بالشكل دا ولائهم هيزيد اكتر و اكتر.
دى الحاجة اللى بيسموها في علم التسويق الBrand Loyalty ، يعنى انك تخلى العميل بيثق بس في المنتج بتاعك و ميشتريش غير منك و يخلى ناس تانية كمان تشترى منك، و دى من اعلى درجات الmarketing. 😉
النت بيتحرك بسرعة رهيبة، لدرجة ان مبيعات سنة واحدة اونلاين تساوى 5 سنين في عالم الواقع ! بس مبادئ او اساسيات بداية المشروعات اونلاين ثابتة زى ما هيا.
لو انت لسة بتبدأ شغلك اونلاين، امشى عالخطوات دى، او لو انت بتشتغل اونلاين فعلا، راجع طريقتك بسرعة و شوف هل انت مطبق كل الخطوات دى صح ولا نسيت خطوة.
اهم حاجة الأساسيات 😉
المصدر : وادي المشمش